როდემდე დაჰყოფს მიხეილ სააკაშვილი კლინიკა „ვივამედში”?!

ჯანმრთელობის მდგომარეობის გამო, მიხეილ სააკაშვილი რუსთავის მე-12 პენიტენციური დაწესებულებიდან კლინიკა „ვივამედში” გადაიყვანეს. მას იქ დიაგნოსტიკური კურსი და დამატებითი კვლევები ჩაუტარდება. უსაფრთხოების მიზნით, კლინიკის მიმდებარე ტერიტორიაზე პენიტენციური სამსახურის ავტომობილებია მობილიზებული და ტერიტორია ყვითელი ლენტით შემოსაზღვრული. გუშინვე ვრცელდებოდა ინფორმაცია, რომ ექს-პრეზიდენტისთვის კლინიკის მეხუთე სართულზე პალატა მზად იყო.
კლნიკაში გადაყვანის შეთავაზება, კონკრეტულად „ვივამედში“, მესამე პრეზიდენტმა ორი დღის წინ მიიღო, როდესაც მთავრობის სხდომის დასრულების შემდეგ, იუსტიციის მინისტრის – რატი ბრეგაძის მხირდან აღნიშნული შეთავაზება გაკეთდა. ამის შემდეგ ისაუბრა მიხეილ სააკაშვილმა, მეორე დღეს კი, ეკა ხერხეულიძემ, რუსთავის მე-12 პენიტენციური დაწესებულების დატოვების შემდეგ განაცხადა, რომ ეს არ იყო მიხეილ სააკაშვილის მხრიდან ულტიმატუმი და სააკაშვილი მზად იყო გადასულიყო „ვივამედში“. შესაბამისად, გუშინ მთელი ღამის განმავლობაში იყო მოლოდინი, რომ სააკაშვილს 11 მაისს გადაიყვანდნენ კლინიკაში, თუმცა მისი ტრანსპორტირება 12 მაისს, დილის 10 საათისთვის განხორციელდა.
თუ რამდენ ხანს დაჰყოფს მიხეილ სააკაშვილი კლინიკაში, „ვივამედის“ ხელმძღვანელობას ამასთან დაკავშირებით კომენტარი არ გაუკეთებია. თავად სააკაშვილის სურვილი იყო, რომ დედამისი – გიული ალასანია დასწრებოდა გამოკვლევის პროცესს. როგორც გიული ალასანია აცხადებს, მას არ აქვს ინფორმაცია, მისცემენ თუ არა ნებას დაესწროს შვილის დიაგნოსტიკის პროცესს.
კლინიკაში მისული „ნაციონალური მოძრაობის“ წევრის, გიორგი ჩალაძისთვის, რომელიც გიული ალასანიას ადგილზე მოსვლას ელოდებოდა, პრიორიტეტად რჩება მიხეილ სააკაშვილის მესამე ქვეყანაში სამკურნალოდ გადაყვანის პროცესი. როგორც ჩალაძე აცხადებს, ეს არის ერთგვარი მოსამზადებელი ეტაპი, რომ ექს-პრეზიდენტმა მგზავრობა შეძლოს და გადაყვანისას პრობლემები არ შეექმნას.