ბათუმის ბოტანიკურ ბაღში ორზოლიანი ზიპლაინი მოეწყობა. ახალი ტურისტული სერვისით სარგებლობა ბაღის ვიზიტორებს ზაფხულში შეეძლებათ. ამასთან დაკავშირებით, ბოტანიკური ბაღის დირექტორმა, ირაკლი არჩაიამ და შ.პ.ს „მწვანე ლაინი“-ს დირექტორმა, გიორგი მერკვილაძემ ხელი მოაწერეს ხელშეკრულებას. ამ ხელშეკრლებით, იჯარის უფლებით და განსაზღვრული საზღაურის გადახდის, შესაბამისი პირობებისა და ვალდებულებების შესრულების პირობით, ბოტანიკური ბაღის არასასოფლო-სამეურნეო დანიშნულების მიწის ნაკვეთი კომპანიას ზიპლაინის მოსაწყობად გადაეცემა.
პირობების თანახმად, შ.პ.ს „მწვანე ლაინი“, მისი ხელმოწერიდან ასი კალენდარული დღის განმავლობაში, ტურისტული მომსახურების გაწევის მიზნით, ბოტანიკური ბაღის შეთანხმებულ ლოკაციაზე უზრუნველყოფს არანაკლებ ორხაზიანი ზიპლაინის ატრაქციონის მოწყობას, მოწყობისათვის საჭირო ნებართვებისა და ლიცენზიების მოპოვებას და შესაბამისი უსაფრთხოების ნორმებისა და სტანდარტების დაცვას.
