ბათუმში, სასტუმრო „ინტურისტში“ დასაქმებულები, წუხელ ღამით, ჩინურ კომპანია „ლონგ სინ ჯგუფის“ წევრებს შენობაში არ უშვებდნენ. ისინი მიზეზად შრომითი ხელშეკრულების დარღვევას ასახელებენ. ჩინური კომპანია, ბათუმში დაქირავებულ ქართველ თანამშრომლებს ხელფასს 4 თვეა არ უხდის. ასევე არ იხდის სასტუმროს იჯარის ფულსაც.
„ინტურისტის“ ტექნიკური სამსახურის უფროსი, სულხან ზოიძე აცხადებს, რომ კომპანიის წარმომადგენლობის ნაწილმა სასტუმრო დატოვა, ნაწილი კი ძალით ცდილობდა სასტუმროში შესვლას.
პრობლემის მოგვარების მიზნით დაზარალებულებმა პოლიციის მე-6 განყოფილებას მიმართეს. ცნობისთვის, 5 თვის წინ, სხვადასხვა ჩინური კომპანია და ასობით ჩინეთის მოქალაქე ბათუმში ჩამოვიდა. მათ რამდენიმე სასტუმრო იჯარით აიღეს პერსონალის მომსახურების ჩათვლით.
„ვინ მისვა მათ იმის უფლება, რომ საქართველოს მოქალაქეს მათი ნამუშევარი არ გადაუხადონ. მანამდე დაცვის თანამშრომლები წავიდნენ სამსახურიდან უხელფასობის გამო. დააყანეს თავისი ჩინელი დაცვა, უფროსობა ჩამოვა და ისინი მოგცემენ ხელფასებსო“ – აცხადებს „ინტურისტის“ ტექნიკური სამსახურის უფროსი სულხან ზოიძე.
უცნობია ჩინური კომპანიის წარმომადგენლობის პოზიცია.
