გათამაშებული მასკარადი „ბათუმი ამბასადორის“ გარშემო და მინიმალური ჯარიმა „მფარველებისგან“

ბულვარის ტერიტორიაზე „ბათუმი ამბასადორის“ მშენებლობის გარშემო ვნებათაღელვა ჯერ კიდევ გაზაფხულზე დაიწყო. კერძოდ, 5 აპრილს ბათუმის საქალაქო სასამართლომ სათანადო დასაბუთების გარეშე არ დააკმაყოფილა „სოციალური სამართლიანობის ცენტრის“ და საზოგადოება „ბათომის” მოთხოვნა შეჩერებულიყო 19-სართულიანი (საიდანაც, 3 მიწის ქვეშ დაიგეგმა) სასტუმროს მშენებლობა კულტურული მემკვიდრეობის ძეგლის – ბათუმის ბულვარის ტერიტორიაზე. მიღებულ განჩინება ცენტრმა ქუთაისის სააპელაციო სასამართლოში გაასაჩივრა, რომლის ფარგლებშიც მოითხოვა მშენებლობის დაუყოვნებლივ შეჩერება.
იმ დროისთვის, „ამბასადორი ბათუმის“ მე-9 სართული შენდებოდა ანუ ძეგლისთვის დასაშვებ პარამეტრებზე 6 სართულით მეტი.
სასამართლომდე ერთი კვირით ადრე, ადგილობრივების უკმაყოფილება გამოიწვია ბათუმის საკრებულოს სხდომამ, რომელზეც ერთ-ერთი მსხვილი კერძო კომპანიის მოთხოვნით, ბულვარის პლაჟის ნაწილის კერძო საკუთრებაში გადაცემის საკითხზე უნდა ემსჯელა საკრებულოს. მოქალაქეთა პროტესტის საპასუხოდ, აჭარის მთავრობის თავმჯდომარემ, თორნიკე რიჟვაძემ განაცხადა, რომ ძველი ბულვარის ისტორიულ-კულტურული სტატუსის გათვალისწინებით, ახალი მშენებლობების დაწყებაზე გამოაცხადებდა სრულ მორატორიუმს კონსერვაციის გეგმის დამტკიცებამდე. თუმცა, რიჟავაძემ იქვე განმარტა, რომ მორატორიუმი არ შეეხებოდა „ამბასადორი ბათუმის” მიმდინარე მშენებლობას.
ეს მაშინ ფიქრობდა ბატონი რიჟავაზე ასე, თორემ სექტემბრის მეორე ნახევარში, წინასაარჩევნოდ ანუ, რატომღაც აზრი შეიცვალა და კომპანია „ბათუმი ამბასადორის“ დაჯარიმებაზე ალაპარაკდა. ამას წინ უძღოდა აჭარის კულტურული მემკვიდრეობისა და ძეგლთა დაცვის სააგენტოს დასკვნა, რომ ბულვარში „ბათუმი ამბასადორის“ მშენებლობა კანონდარღვევებით მიმდინარეობდა. მოკლედ, რიჟავაძის განმარტებით, „ბათუმი ამბასადორმა“ თვითნებურად მიიღო გადაწყვეტილება, რომ მე-17 სართულის მშენებლობა დაეწყოო.
როგორც გაირკვა, არანაირი თვითნებურ გადაწყვეტილებაზე არ არის საუბარი – მე-17 სართული შეთანხმებული იყო საკრებულოსთან, მხოლოდ მსუბუქი კონსტრუქცია. შემდეგ, ეს კონსტრუქცია „მძიმედ“ მიიჩნიეს საკრებულოს წევრებმა და აჭარის კულტურული მემკვიდრეობისა და ძეგლთა დაცვის სააგენტომ. რაც მთავარია, ისიც შეიტყვეს, რომ სახურავზე ვეტმფრენის დასაჯდომი იგეგმებოდა.
არადა, 17 კი არა, 10 სართულზეც არ უნდა გაცემულიყო ნებართვა. ის, რომ „ბათუმი ამბასადორი“ ჯერ კიდევ გაზაფხულიდან კანონდარღვევით შენდებოდა სწორედ ადგილობრივი მთავრობის ნებართვით – ამაზეც ხმას არ იღებენ. მარტო ახლა აღმოაჩინეს, არჩევნებამდე რამდენიმე დღით ადრე, რომ თუმრე მე-17 სართული მძიმეა, სართულებს შორის სიმაღლეა მომატებული და ჯამში სამი მეტრით მაღარ შენობას იძლევა, ვიდრე თავდაპირველი პროექტით იყო გათვალისიწნებული.
დღეს აჭარის მთავრობა 10 000 ლარიან სანქციაზე ალაპარაკდა და მე-17 სართულის დემონტაჟზე. და რა?! გადაიხდის მილიონერი კომპანია მისთვის ამ უმცირესს ჯარიმას და მე-17 სართულის დემომტაჟს გააკეთებს. დაზარალდება ამით?! თუმცა, დარწმუნებული ბრძანდებოდეთ, მე-17 სართულსაც არავინ მოახსნევინებს – დიდი-დიდი ვეტმფრენის დასასმელი არ გააკეთებინონ!