თბილისის სასწრაფო სამედიცინო დახმარების ცენტრის დირექტორის, მაკა გვარამიას განცხადებით, ბრალდება, რომ სასწრაფო-სამედიცინო დახმარების ცენტრის ხელმძღვანელობა გარიგებულია კონკრეტულ კლინიკებთან და პაციენტების შეყვანა მხოლოდ აღნიშნულ კლინიკებში ხდება, სიცრუეა.
გვარამიამ აღნიშნული განცხადება ცალკეული კლინიკების ჰოსპიტალიზაციის სისტემის მისამართით გაკეთებულ შენიშვნებთანდაკავშირებით გააკეთა. აღსანიშნავია, რომ აუდიტის დასკვნამ, სისტემაში ხარვეზების არსებობა დაადასტურა.
როგორც ცენტრის დირექტორი განმარტავს, კლინიკების ნაწილი პაციენტების რაოდენობის კლებას სასწრაფო დახმარების ცენტრს უკავშირებს, თუმცა, ეს კლინიკების რაოდენობისა და კონკურენციის ზრდას უკავშირდება.
,,ბოლო დღეების განმავლობაში მედიასაშუალებებით აქტიურად ვრცელდება ზოგიერთი კლინიკის მხრიდან მიზანმიმართული განცხადებები, თითქოს სასწრაფო სამედიცინო დახმარების ხელმძღვანელობა გარიგებულია კონკრეტულ კლინიკებთან და პაციენტების შეყვანა ხდება მხოლოდ ამ კლინიკებში, რაც, ცალსახად მინდა აღვნიშნო, რომ არის ძალიან დიდი სიცრუე. მათ არგუმენტად მოჰყავთ მხოლოდ აუდიტის 2014-2015 წლის დასკვნა, რაც მოიცავს არამხოლოდ სასწრაფო-სამედიცინო დახმარებაზე რჩევებს, არამედ არის სისტემური რჩევები ჰოსპიტალიზაციასთან დაკავშირებით. ჩვენთვის ეს მისაღებია და ვიწყებთ მუშაობას ხარვეზების გამოსასწორებლად. რაც შეეხება კლინიკებს, რომლებიც მუდმივად მანიპულირებენ, რომ მათთან ჰოსპიტალიზაცია შემცირდა, მოგახსენებთ, რომ ბოლო წლების განმავლობაში ფართოდ განვითარდა ჰოსპიტალური სექტორი, კლინიკების რაოდენობამ იმატა და გაიზარდა კონკურენციაც. აქედან გამომდინარე, ცენტრი ახორციელებს პაციენტების გადაყვანას კლინიკებში მათი სერვისების, შესაძლებლობების, მდებარეობის, პაციენტთა შემხვედრი საჭიროების გათვალისწინებით.
ასეთი კლინიკა შეიძლება მოშორებული იყოს პაციენტისგან. ჩვენ პაციენტს ან მის ოჯახის წევრს ვაკეთებინებთ ჩანაწერს ჩვენს ბარათზე, სადაც ის ხელმოწერით ადასტურებს, რომ მას სურს კონკრეტულ კლინიკაში გადასვლა”, – განაცხადა მაკა გვარამიამ.
